星味工房 海南雞專門店 (已結業)

今日我們又喺粉嶺附近做完嘢之後，行過聯和道見到有間主打係食星洲食物嘅餐廳，所以我們就決定入去食晚飯！一坐低之後我們諗緊想叫咩食嗰陣，睇到坐喺隔離嘅其他人客大部分都係叫娘惹咖哩牛腩飯同招牌星洲鷄飯「無骨」，所以我們就叫咗嚟食，娘惹咖哩牛腩飯嘅咖哩汁味道非常香辣同惹味濃郁，而且濃稠度亦調教得恰到好處，唔會過稠或過稀，牛腩燜得好腍好入味，肉質相當鬆軟，牛肉味亦好香濃，再配埋白飯一齊食，簡直係絕配呀！招牌星洲鷄飯「無骨」嘅肉質極之嫩滑，最好仲要係無骨嘅，食落啖啖肉，真係好正呀！火腿鷄絲湯狗仔粉嘅材料相當足料，差唔多舖滿晒表面，要撥開先可以睇到啲狗仔粉，狗仔粉質感好煙韌彈牙，而鷄絲就唔係平日喺其他餐廳食開嗰種雪藏嘅鷄肉絲，而係用新鮮鷄肉撕成鷄絲，呢樣係最令我們覺得驚喜㗎！跟餐附送嘅老火例湯煲得火候十足，味道非常鮮甜濃郁！