金祥排骨麵

營業中

休息中

星期六午飯時段嚟到西環好出名嘅排骨麵店，前面有五六個人，排咗大概廿分鐘先有得入。眼見人人都係點排骨麵，但原來有排骨粗炒所以點咗排骨湯麵同粗炒各一。菜膽雲吞排骨湯麵先上枱，上海麵麵質幾好有少少煙韌，湯就比較清淡無咩味精。上海雲吞好味，好似屋企食到嘅味道。即點即炸嘅排骨係另上，排骨炸到金黃色賣相好靚。炸粉唔算厚食落酥脆，但唔會過份油膩。食落無鬆肉粉味，再加上一邊食一邊聽到廚房嘅揼豬扒聲，我估真係無落鬆肉粉。排骨粗炒等咗一陣先有得食，大大塊排骨放喺粗炒上面賣相好吸引。粗炒比起一般上海粗炒淺色同埋少油，食落比較淡味，係走健康路線嘅上海粗炒。上海粗炒份量好大，所以最後食唔晒，下次都係叫返湯麵好啲。排骨麵嘅主角-排骨的確幾出色，值得排隊一試。但始終都係食咗十幾年嘅大埔炸豬扒麵最好味。