金祥排骨麵大王 (已結業)

睇完上面嘅食評，慕名而去，原來呢間茶餐廳可算係蒼海遺珠！晏晝一點去，坐咗成個鐘都冇滿人，除咗成隊球隊黎食飯時稍為多啲人，但係都仲有位淨。唔想等位嘅話，可以考慮呢度。等朋友到時，見到有架噴泉式果汁機裝住啲豆槳，六蚊杯，就試下。好香，不過稍為甜咗些少。我叫咗個馳名嘅菜膽排骨雲吞麵，排骨就正如上面所講，皮脆肉腍，唔太鹹唔太淡，係每一方面都適中嘅技術。至於雲吞，大粒係幾大粒，不過裡面好似唔係好多肉，但係神奇在連我咁嘅食肉獸都覺得冇問題，味道有響度就得。而個白菜膽都幾新鮮。最大問題係個粗麵。可能煮得太耐，所以嫌佢好似溶溶地咁，唔夠結實。下次會試蛋麵。朋友叫咗紫菜腐皮卷麵，腐皮卷通常淡而無味，靠汁索味。但係卷埋塊紫菜響裡面，香之餘又有味，係唔錯嘅配搭。凍飲連嘢食只需加六蚊（單叫十一蚊），通常卅幾蚊可以埋單，幾抵。最後補充一句，記得叫排骨另上。浸濕哂就唔好啦。而排骨單叫一塊要十三蚊。