九份•十分 (河畔花園) (已結業)

要搵得出沙田有好台灣野食真係少之有少，之前聽過朋友講過呢間九份十分，估唔到原來沙田有分店，不過離新城市廣場遠少少，要經過城門河，到花園城入面就搵到呢間餐廳！呢度真係咩台灣野都有，上至台灣香腸，下至三杯雞，你諗到既都有！我地不停叫不停叫，最後叫左好多野：魚丸貢丸湯$22有八粒，分量唔算多，但原汁原味，好似返咗淡水食佢嘅淡水阿給咁！滷水拼盤呢個有啲似香港同台灣mix埋既滷水拼盤，台灣見得多唔同嘅滷水食物包括豆干豆皮呢度都有，仲加上香港嘅滷水食物，包括豬大腸雞全翼，包羅萬有，滷水味十足。湯浸肉燥娃娃菜台灣肉燥永遠咁好食，加上娃娃菜煮得好林，平時唔太食菜嘅我都食咗好多！忌廉芝士蘑菇雞肉肉操飯呢個係驚喜之作，芝士同蘑菇釀入雞翼度，好有新意，超 級 惹 味，非常邪惡，食十件都唔夠食，送飯一流！芭樂鳳梨鹽水雞干拌麵本身已經食到飽飽地，但呢個簡直非常創意，本來以為加水果入咸食會唔好味，但就大錯特錯了，雞肉嫩滑，青瓜爽脆，加上拌面辣辣地，又有水果既新鮮甜味，突然一切變得好夾！