台灣麵 (已結業)

今日同女人出開花園街買野，行完就去左始創搵食。間野喺地牢嗰層幾顯眼，好明顯就知係食台灣野，又唔係貴。都幾多枱，唔係坐得迫，所以好快有位坐。招牌生果茶，百香果茶做底，加左橙同檸檬落去，令到杯野甜得黎又酸酸地。寶島珍珠奶茶，女人話珍珠幾煙韌，奶茶好滑，唔係好甜幾好味。涼拌雞絲粉皮，滿滿的麻醬撈埋爽口既青瓜同粉皮，一啲都唔漏好好食。金銀蒜炒白菜仔，啲蒜炒完幾香好入味，菜炒得幾淋身。蚵仔煎，食落真係好似台灣既質感同味道，韌韌地唔黐口，醬都係同當地差唔多味，只係無用菜做底~紅燒牛肉麵，湯底香濃又有少少辣，肉質腍得黎又幾有嚼口，麵條亦都幾煙韌。