囍雲天酒家 (已結業)

之前響觀塘碼頭學完車，都會行下觀塘海濱公園， 行完過對面的宏利金融中心見到囍雲天都想試下，所以今日帶家人來一齊飲茶。入到酒樓，先有一排卡位，適合四至五人，再行入裡面好光猛，一個無敵大廳，再加埋門口的花圈拱門，格局好適合擺酒婚宴用。我地坐在近窗邊位。先叫菜苗餃$34.8，已望到翠綠的菜苗，晶瑩剔透的餃皮好薄，裡面好多菜苗爽口，有少少蝦同肉，夠鮮甜。北菇棉花雞$35.8，好大隻冬菇，有三四大塊的魚肚，魚肚好彈牙，靚魚肚冇腥味，雞肉夠嫩滑。沙律蝦春卷$34.8外皮好酥脆，裡面有蝦肉同雜果，少少沙律醬，好開胃。想食太極鴛鴦炒飯$148，上枱時好大碟，多料，好大隻蝦，蕃茄酸味開胃，肉絲好鮮甜，最正係個炒飯底，蛋包住每粒飯粒好香，食完停唔到口。甜品叫了擂沙湯丸$28.8，外皮煙韌，餡有流心的芝麻香，唔會太甜。另外都叫了碗糖水，罕見有蛋白杏仁茶$38，杏仁味濃，有細粒粒杏仁碎，是新鮮即磨的，夠多蛋白好滑。埋單時見茶芥收$12位。臨走時見到有張10:30 前下單的特價點心紙，下次都要早啲來飲先。