茶木‧台式休閒餐廳 (已結業)

一段時間冇食，原來茶木同小丸子crossover，出咗好多新野。我哋嗌嘅全部都係新野，叫咗一個小玉同學嘅藍蝶檸檬愛玉、一碗紅燒半根半腩牛肚麵、一個話梅粉地瓜條、同埋一個義式辣茄醬牛柳絲燉飯鍋。首先呢個檸檬愛玉，有幾濃嘅檸檬味，甜甜地酸酸地咁，愛玉分量多，飲落去啖啖肉啊！如果鍾意愛玉嘅朋友，相信呢個幾適合你。另外個牛肉麵呢，湯底十分之濃郁，但唔會覺得過鹹，麵質好彈牙，唔會淋哂，所以呢個手作面都十分唔錯，但係牛筋牛腩就正正常常冇乜特別，反而牛肚十分入味幾好食。至於個義式辣茄醬牛柳絲燉飯就比較普通啦，個飯有少少過熟，而且呢個辣，都算係中辣，飯裏面隱藏不少辣椒仔，怕辣嘅朋友要小心！如果你鍾意食蕃茄同辣味嘅配搭，呢個飯都係一個唔錯嘅選擇。咁多道菜，最有驚喜嘅，係呢一個價值$30嘅話梅粉地瓜條，地瓜條外脆內軟，炸到金黃色，啱啱好！配埋足夠嘅話梅粉，係十分之好味！就好似食緊台灣嘅話梅粉地瓜球咁樣，以呢個價錢來講絕對係物有所值呢！埋單一人大約一百幾蚊，坐得舒服，嘢食又有驚喜，讚！