恆河咖喱屋 (已結業)

過年食完咁多中菜，好想換下口味，一於去筲箕灣恆河咖喱屋食印度菜先。餐廳環境好企理，放有印度風情嘅掛畫同裝飾品。見Lunch set好抵食（$78 each)，我哋兩個人一人叫咗一個再加咗個小食。餐湯：是日餐湯係蕃茄湯。蕃茄味濃郁，酸酸maymay咁. 好開胃。瑪莎拉牛腩配烤餅：牛腩都有成10粒。牛腩炆得夠林又唔會太散。醬汁加咗好多香料，令味道好有層次。烤餅係去食印度菜必食嘅菜式。而呢度嘅烤餅，做得好出色，熱辣辣，餅底脆脆地，入邊好軟熟。配埋醬汁一齊食好夾！印度炒飯：用印度嘅長米飯，加上叉燒，雞蛋，雜菜粒同香料炒成。同我哋一般食開嘅廣東炒飯好唔同，的確係好有印度特色。蔬菜咖喱角（$48）：推薦！入邊有薯仔蓉及唔同嘅豆類！炸得脆脆嘅皮加埋軟熟同惹味嘅餡料，好好味！印度瑪莎拉茶（跟餐加$20）：職員即場喺你面前製作呢杯奶茶。拉得好高！拉茶嘅目的係令奶茶同埋空氣混合得更好. 飲嘅時候有啲薑同埋香料嘅味道. 係一個充滿印度特色嘅飲品。職員非常有禮貌，並耐心解答客人嘅查詢。抵讚！另外，恆河咖喱屋亦係入選米芝蓮指南香港澳門2011及2012嘅餐廳，唔怪得咁人客幫襯。