一樓咖啡室 (已結業)

由於喺媽咪正日生日嗰日我們已約咗Oppa一齊慶祝，而4姨媽同表姐又聽我們提過話銅鑼灣怡東酒店嘅「一樓咖啡室」有阿拉斯加長腳蟹食，兼且係要星期五、六，日先有得供應，所以我們特意一早約定喺今晚星期日提早同媽咪慶祝生日，因要選擇坐窗口嘅位置要早三個星期前預訂，可以一邊享受美食，一邊欣賞維港嘅景色，真係一大享受！之前嚟食過都有讚過一點話，他們相當貼心，一早將啲阿拉斯加長腳蟹腳剪開晒，完全唔駛人客自己落手剪，就可以食到啖啖嘅蟹肉，呢點4姨媽同表姐都非常讚賞！開邊凍龍蝦嘅膏超多，味道好甘香軟滑，肉質相當爽甜彈牙！香煎鵝肝多士嘅鵝肝煎得外脆內軟，入口即溶，夾埋香脆嘅多士一齊食，可以吸收晒鵝肝油嘅甘香，就算油嘅份量比較多，都唔會有好油膩嘅感覺！另外仲有原條即燒魚，外皮燒得好香脆惹味，肉質相當鮮味彈牙！由於4姨媽唔係好食其他肉類，主要係食魚類，所以另外再攞咗清蒸黃立䱽嚟食，因蒸嘅時間火候啱啱恰到好處，所以肉質好鮮嫩！總括：4姨媽同表姐都讚我們決定今晚嚟呢度食自助晚餐係正確嘅！因呢度嘅款式種類都幾多，而且阿拉斯加長腳蟹係不斷供應，呢點係我們最讚㗎！