長發麵家 (已搬遷) 新店位置

小弟鍾意食牛腩，但以往都係食清湯腩，又或者係咖喱牛腩。柱候牛腩？真係好少食呢。之前講過要征服整條耀東街，是日去到最後一站的長發，目標好明確︰一碟牛腩撈。等緊既時候，留意到那個大到可以煮成隻牛的大煲，那個裝住整間舖頭的心血的大煲。只見小二揭起煲蓋不停咁搞啲牛腩，一陣白煙隨即冒上，真係睇見都期待。牛腩撈話咁快就到。牛腩好深色，食落好入味，醬汁有好濃郁的香味又唔會過鹹，好出色的柱候醬。牛筋好滑，但係冇咁肥個幾舊牛腩就稍為韌左啲，而且欠缺左牛味，係美中不足的。麵亦幾爽口彈牙，好容易就用啲汁撈晒來食。附上既湯好驚喜地非常之清甜，唔係味精湯而係有好香的蝦子味，又係好快就飲晒。好多人甘願付上幾百蚊去高級餐廳食，因為除左食物之外仲可以「食環境」。但其實大排檔都好風味十足的，懷舊的擺設，樸素打扮的小二和客人，散發住傳統味道的食物...而依種「環境」只需要幾十蚊就買得到，只要換一換自己既心態，其實個種滿足感都係一樣的，甚至可能更大。