上勝日本料理 (億利工業中心) (已結業)

今日同老婆去荔枝角 D2 Place 行街，行到肚餓就見到呢間日本料理，就入去試下啦~三文魚牛油果沙律，佢個造型真係不得了,一上枱我老婆即刻"嘩"咗一聲。先試食上面脆脆嘅麵條，再試下面爽脆嘅柚子醋生菜，嘅味道好開胃。主角三文魚份量都唔少，亦都好鮮味，牛油果非常綿滑，兩樣配埋 washabi 豉油真係好滿足~海膽松葉蟹肉丼，蟹肉非常鮮甜，海膽甜得嚟好甘，味道充斥住整個口腔，超好味！再加上爽脆嘅青瓜，脆卜卜嘅蟹子配埋壽司醋飯，真係一流！浦燒厚鰻魚，厚厚嘅鰻魚配上燒汁，鰻魚有少少爽口，雖然我個人比較鍾意食"林"嘅鰻魚，但係呢個我都覺得好好味，每一口都充斥住鰻魚的香味，正~一口和牛(鹽燒)，鬆化嘅牛肉，加上濃濃牛肉味，好味！日本芝士蛋糕，非常濃厚嘅芝士味，上層好似燒過，有一層薄薄嘅脆皮，呢個絕對係老婆嘅最愛~巨峰乳酸梳打，呢個一向係我哋嘅最愛，巨峰加乳酸梳打嘅味道真係令人難以抗拒！提子味波子汽水，日本汽水果然係唔同啲，提子味好香濃，超好飲~下次要再試埋佢其他嘅丼飯，食到咁飽真係要散完步先返屋企。