影片
更多
2013-03-28
1624 瀏覽
聽朋友講呢間唔錯, 今晚各食家擺明車馬黎踩場，訂左全酒吧最 private 又最有私人空間既座位，thank you ﹗係酒吧最深處又最近往廁所通道添。依家剛才七點，仲好早呢，小貓兩三隻無咩客，環境都幾清靜又企企理理啦。 食家未齊人，先 study 吓個 menu，Pizza 只得 3 款，小食都係幾款。見到 special promote 呢 ﹗order 1 支紅或白酒送 1 個併盤，淨係個小食都值二百幾，似乎都抵咁噃。Free 併盤可揀 24 個月西班牙伊比利黑毛豬火腿、巴馬火腿、生蠔，仲有海鮮併盤。今晚 Table for 8 ﹗坐左半個鐘，食家們都仲未到齊，唯有先黎支法國白酒飲住先，Pierre Gewurztraminer白酒，先試第一隻。味道帶荔枝香味，中度甜味，質感滑，入口完全無苦澀味，鍾意甜既朋友就啱晒喇 ﹗但個人夠喜愛微甜中而酒濃。如果枱面上既花生能轉為各類果仁就更開心喇 ﹗侍應們真的對紅白酒非常認識，解釋既詳盡令我有點驚訝 ﹗仲見到店主推介既杜拜七星級酒店紅酒，但大家不太感興趣。煙鴨胸，店主推介？食落有煙燻香味，味道調得偏濃，夾住青瓜同吃可減低咸度而令味覺清新一點
食家未齊人，先 study 吓個 menu，Pizza 只得 3 款，小食都係幾款。見到 special promote 呢 ﹗order 1 支紅或白酒送 1 個併盤，淨係個小食都值二百幾，似乎都抵咁噃。Free 併盤可揀 24 個月西班牙伊比利黑毛豬火腿、巴馬火腿、生蠔，仲有海鮮併盤。
今晚 Table for 8 ﹗坐左半個鐘，食家們都仲未到齊，唯有先黎支法國白酒飲住先，Pierre Gewurztraminer白酒，先試第一隻。味道帶荔枝香味，中度甜味，質感滑，入口完全無苦澀味，鍾意甜既朋友就啱晒喇 ﹗但個人夠喜愛微甜中而酒濃。如果枱面上既花生能轉為各類果仁就更開心喇 ﹗侍應們真的對紅白酒非常認識，解釋既詳盡令我有點驚訝 ﹗仲見到店主推介既杜拜七星級酒店紅酒，但大家不太感興趣。
煙鴨胸，店主推介？食落有煙燻香味，味道調得偏濃，夾住青瓜同吃可減低咸度而令味覺清新一點。鴨肉鴨皮處理得宜，皮脆不油不靭、肉嫩無渣，還可以啦，欠左份鮮肉既香氣。靚鴨胸真係無需要太多花巧，海鹽醃再煎切片已經好好食，可配橙、草梅、蘋果依類既 dressing 使味道更豐富。
8 位食家終於到齊喇 ﹗起動 ﹗Promotion 1 支紅或白酒送價值二百多三百蚊既 1 款併盤，可選海鮮、黑毛豬、巴馬火腿或生蠔。唔食野都得，回贈返 HKD70 蚊比您添，聽落都好鬼抵喎 ﹗
巴馬火腿併盤，跟類似沙樂美腸既腸仔片、火腿粒、鵝肝醬多士、葡萄乾、車厘茄，仲有少少豆苗墊底。賣相一流，第一眼望到已感到個外觀、組合、配菜都好鬼歐洲 ﹗意大利巴馬火腿咸香非常，肉質富彈性而有趙口，油份充足，如果能卷住清甜既水果同吃，甜味撞咸味係一個非常特別又美味既感受 ﹗但依家盤上只有幾片青瓜及兩片車厘茄，有點 dry 咯。
西班牙伊比利黑毛豬火腿熟成 24 個月，嘩 ﹗個名夠晒勁 ﹗味道比巴馬火腿更濃，而油份更加豐富。但我真係食唔到有橡果香或味道，但橡果到底係咩味架？哈哈。以我個人口味而言，我真係好需要有舊非常 juicy 而味道清甜既蜜瓜或哈蜜瓜同時放入口一齊食架 ﹗不過依家一啖火腿一啖甜白酒都還可以啦 ﹗甜更能帶出火腿既咸香，感覺好爽架 ﹗真陰功，無蜜瓜無哈蜜瓜又無無花果，唯有用生菜青瓜配火腿啦，慘 ﹗
海鮮併盤，法國睡蟹半隻、法國藍青口 10 隻、加拿大翡翠螺 4 隻、紐西蘭龍蝦仔 2 隻及熟蝦 4 隻 ﹗種類都幾多喎。我最鍾意食海鮮架喇，食家 8 名，點分好呢？呵呵呵。
加拿大翡翠螺，恭喜晒 ﹗第一位 ﹗應該係全個併盤最好食架喇。味道鮮而肉嫩帶海水味，質感又軟棉，Good ﹗不過依個唔係冷盤黎咩？暖暖地喎，哈哈哈 ﹗
紐西蘭龍蝦仔，第二位係龍蝦仔，蝦肉嫩帶香濃香草牛油味，雖然浸得有點過火，偏咸左少少，都合格啦 ﹗第三位就係熟蝦，味道較淡，肉質微爽，不過不失啦。
法國藍青口，並無作任何調味，烚得有點過火，開始粉口而彈力不足。點解咬落青口度會咁多水既？味道似溶雪既水喎，怪怪的。
法國睡蟹，我好鍾意食蟹，但係一向不太喜歡睡蟹，所以可能未食已經扣點分數，我係花蟹、紅蟹、奄仔蟹、大閘蟹、三點蟹、雪場蟹、毛蟹既 fans 黎架 ﹗依隻睡蟹蟹膏算豐富，質感硬而散，帶重海水味道，甘香度及質感較為遜色。蟹肉實而乾，鮮甜味及肉汁欠棒，免免強強啦 ﹗
生蠔併盤，今晚有法國、美國及愛爾蘭。各食家都無咩所謂，連我地位蠔后都話隨便，所以交比侍應哥哥發板啦 ﹗
半打愛爾蘭premium 及半打美國 blue point，侍應哥哥作此選擇真係估佢唔到 ﹗大家都有點出奇了 ﹗我最愛係 Belon 同 Ribbon point，其次有 Irish rock、white pearl，對美國生蠔真係麻麻地，不過我勁鍾意食美國桶蠔打邊爐喎 ﹗好味 ﹗侍應哥哥一輪介紹後，大家立即起動。兩款蠔分別不太大，口感較實而裙邊爽，都有淡淡既鮮蠔味道，不過 after taste 非常淺，Blue point 海水味比 premium 更濃。生蠔質量可以接受，都合格，size 就夠晒大喇，味道不過不失啦，都好明白生蠔真係好睇個人口味既 ﹗
馬穌里拉薄餅，熱辣辣上枱，顏色賣相非常討好，好靚喎 ﹗大家都非常期待。擘大個咀，大大啖咬落去，大量既香濃芝士搭上酸甜既蕃茄醬撞得非常美味，再加少少既香草，簡單又好食 ﹗薄餅邊烤得脆脆的，好鬼香口喎，但點解個餅底濕濕地又腍劈劈既？口感似上海小食蔥油餅囉，即時分數大跌了，有點美中不足。
炸魚薯條？應該係炸魚手指跟薯條呢。侍應哥哥都話不推介，但我地見個胃仲有大把地方，傳聞話食得過，所以好奇心驅使下叫黎試囉。炸魚薯條？oh no ﹗急凍魚手指乾硬咸，而且炸得過火，如果點大量茄汁或沙律醬，應該會好食。另外，幼身長條形薯條，無咩特別，不吃也罷。
今晚試左 3 隻白酒 2 隻紅酒，其實個名都係好難記得到，試過法國及意大利囉。第一口完全唔會澀，味道溫和，全部都係偏甜，愛甜人仕啱晒咀形。雖然係甜，但果香不太出，味道純而酒味淡，口感就稍為薄了點，我較愛飲 strong、酒味濃、厚身及有點 dry 既紅酒，無法喇。
多謝店主今晚既款待及侍應兄弟姊妹既熱情招待，飲飽食醉後，參觀埋個廁所就可以走喇 ﹗行出後門，通過條短短既小道就到洗手間喇 ﹗後欄同洗手間既衛生程度都好滿意，幾乾淨喎 ﹗廁所格好寬躺，兩個人一齊都可以喎，哈哈。
張貼
