發仔記

營業中

休息中

好開心。。人少少，天氣又涼少少，可以嚟圍一圍爐，食發仔記！小店老闆，家庭式經營，只做晚市。其實，如果做埋午市，起碼可以幫補成本。仲可以做多啲街外客。橫掂啲客都係喺街市買海鮮，之後行出嚟食。講真，我覺得嚟發仔記，仲好過上樓上同人迫。今次我哋冇嗌魚仔。天氣涼，反而叫個羊腩煲食！味道一流！絕對唔可以同出面街外嗰啲急凍羊腩對比。出邊食嗰啲，林啤啤，一坺嘢。呢度食嗰啲，一嚿嚿，有咬感。一鍋非常足料嘅羊腩，超正！仲要有非常新鮮嘅生菜。又叫一叫避風塘炒田雞。ok喎！唔錯，香口，田雞又新鮮！值得推介。最後，叫咗一個臘味糯米飯。個糯米飯係新鮮煮嘅，所以同出邊舖頭食嘅會唔一樣。個人建議，如果真係可以係以煲仔上，會好啲！可以有埋飯焦，咁就頂呱呱喇！順帶一提，嚟到呢度，最正嘅就係冰凍藍妹。😋😋😋老闆三哥最識飲。佢自己飲嗰杯啤酒，喺長期冰鎮。