一素食譜

營業中

休息中

東廣場內食肆選擇多，豐儉由人。我每周一都會選擇幫襯素食譜，腸胃負擔輕鬆啲又健康啲。幾乎每次都會選擇三餸車仔麵，可以選擇湯底（冬陰功加6蚊），麵底（菠菜麵，太陽麵，淮山麵等），同十幾款餸菜。份量唔算多，細食女仔應該啱啱好。車仔麵普通湯底你味噌湯，相當唔錯，唔會有太濃豆澀味，亦唔會太鹹，通常一上菜我都會先飲一啖湯，潤潤喉。麵我通常揀菠菜麵，見到舖頭嘅淮山麵選用壽桃牌，下次可以一試。餸菜方面我十分推薦紫豆卷，剛上菜時，有少少脆，豆皮包裹住紫菜，十分香口；浸透咗湯汁嘅時候口感亦十分飽滿濃郁。至於其他餸菜，我會隨機選擇蓮藕，秋葵，蘿蔔等等，味道正常，唯獨有時每件份量切得太大，唔方便食用。午餐仲有其他飯餐選擇，素叉燒南瓜飯，五行飯等等，味道都唔錯，仲包埋一碗熱湯，比較飽肚。整體來講，小店質素唔錯，如果想食得清新，不妨一試。