花都餐廳

喺銅鑼灣返工，有同事介紹咗依間性價比極高，而且位置極方便嘅餐廳俾我。女朋友接我放工，本身有啲頭痕食咩好，諗起同事介紹依間就腳嘅餐廳，就走去試下。一行入去就感覺好愜意，暗暗哋好有格調。首先送上枱嘅係羅宋湯，真係好有驚喜，個湯又熱又足料，濃稠得嚟好惹味，酸酸甜甜配合得好好，飲完成個好開胃，可以準備食大餐。正餐我哋叫咗雞扒同西冷牛扒，真係好好味，完全唔係普通冰室果種醃製過度嘅貨色。個牛嘅黑椒汁好濃，但係又唔會搶咗個牛嘅肉味。個牛外脆內軟，而且啲意粉好爽口，唔會淋。一啖牛一啖意粉，好快就食清光。雞扒都幾好食，雞扒好嫩滑，唔會話好似有啲西餐咁要嚼好耐先吞到。最後仲有啫喱送，成個童年回憶返嗮嚟。我十分推薦喺銅鑼灣返工嘅朋友收工嚟試下，因為又抵又方便。