1樓冰室 (眾安街) (已結業)

今日收工就一個人，諗住係樓下食就算啦！經過舊嘅燉奶佬地址，見到佢開左間新店叫做一樓冰室，客人唔多咁就試下啦！入到去望下個menu同埋望下間舖，應該都係上手燉奶佬留低嘅，menu款式唔多，店員只係俾左兩份我睇，一份係鐵板餐，另外一份就係飯餐，而我就選擇左紅蔥醬油雞套餐啦，選擇左燉湯。奇怪嘅事發生左啦，店員俾我張單竟然係寫住金裝燉奶佬，咁我究竟洗唔洗找數呢？😆最後都係找左啦！因為唔係好多客人，所以都唔係等左好耐，送餐竟然係一位洗碗姐姐，感覺就真係唔係咁好，疫情期間都好多餐廳話送餐同埋執枱分開啦！而家夜晚無咩生意返唔夠人手竟然洗碗姐姐咩都要做，不過好在有個底盤，算啦，生意難做呀。首先試左個湯先，蓮藕排骨湯，都幾足料，不過我估就應該唔係燉啦！飲落去都好味，都唔係好油，唔錯唔錯。到個雞飯啦，驚喜位係已經起晒骨，而且就脾位同埋胸位都有d啦！醬油都係夠味呀！雞食落去都好滑，配上蔥油就真係好好送飯，食埋伴碟果d酸蘿蔔就更加開胃，最後都係成碗食晒。期望間餐廳快d脫離燉奶佬嘅感覺啦，而家感覺上只係改個名。