翟道翟 Tuk Tuk (已結業)

有時真係好佩服喺觀塘返工嘅各位！每次經過馬會對出嘅班馬線，人多車多，非常擠迫。但每日最恐怖嘅就係放工時間，成個觀塘都係人、人、人！難得去觀塘接M佬收工，就俾呢個人海戰術嚇怕，我哋決定食埋晚餐再輕輕鬆鬆返屋企。今日嚟到觀塘嘅翟道翟食泰國菜，餐廳非常闊落，放工就係要輕鬆吧！柚子鮮蝦沙律天氣開始熱，最啱就係食啲開胃嘅嘢啦！今日嘅頭盤就揀咗柚子鮮蝦沙律，柚子甘甜，夠晒醒胃；蝦嘅份量都唔少，大大隻，夠晒新鮮彈牙。炸蝦餅蝦餅即叫即炸，上枱嘅時候仲熱辣辣、脆卜卜！相信蝦餅用咗勁多蝦打成，因為非常彈牙，蝦味濃郁。炭烤豬頸肉豬頸肉烤得啱啱好，唔會太乾，外脆內嫩，配上泰式醬料就更加惹味。泰式海鮮粉絲煲本身預期嘅泰式海鮮粉絲煲會係辣，但原來唔係㗎！大廚用咗好多泰國香料，包括香茅、八角等整成，香味濃郁，味道好有層次，最正當然係索晒汁嘅粉絲啦！另外，海鮮相當豐富，有魚柳、青口、蜆、蝦等等！菠蘿雞粒炒飯原隻嘅菠蘿炒飯，當然係夏天最愛，酸酸甜甜夠晒開胃！飯底炒到金黃色，賣相非常吸引！配料有雞粒、菠蘿、肉鬆、腰果、三色豆等等，口感一流。唯一一個小意見，就係如果預先去咗雞皮就更好喇！