神輿日本料理 (已結業)

話說小編從來唔會主動提出去食放題，主要係品質參差問題，拒絕大堆頭又冇質素嘅食物。”神輿”我嚟過兩次，距離兩次幫襯嘅時間都相隔大半年，食物質素仍然keep到，呢點值得一讚。價錢只係$178-$258，分四個時段供應；自問呢間係我暫時食過最平但係最啱我口味嘅放題。雖然好評、中評各有支持者，但我都覺得大家可以不妨一試，唔使獨沽一味淨係食某某大型連鎖放題。從前菜、刺身、壽司、手卷、炸物、天婦羅、一品料理、爐端燒，”神輿”有超過10張點菜紙，選擇眾多。海膽壽司我哋仲encore左幾次，海膽鮮甜，冇丁點腥臭味，最緊要係紫菜仍然保持香脆。刺身新鮮，多款魚類(三文魚、油甘魚、鯛魚、吞拿魚)，貝殼類(帶子、馬刀貝、北寄貝、蠑螺)都有供應。芝士焗虎蝦我哋每人食咗幾隻，蝦隻新鮮爽口，醬汁適中唔會過多，香口惹味。