熊野日本料理 (已結業)

呢日放工後同個朋友去咗大圍覓食。凍凍地，好想食啲暖嘅日本嘢呢間餐廳離大圍火車站好近，一出站過馬路，再行幾步就到了。入到去，店員好快就招呼我哋到樓上坐。全間餐廳嘅佈置同格局都好簡約，好有日本feel啊，而且環境仲好舒服！一坐低，我哋兩個人，好似餓鬼投胎咁叫咗好多嘢，起勢食。串燒雞腿肉。雞肉好滑，串燒燒得入味啊。三文魚炒飯。同一般出面嘅炒飯比冇咁重味，啱啱好！而且飯都炒得好乾身，口感好好，我同朋友都狂食啊。不過要小心有骨喔！照燒魷魚筒。幾好味，好香，唔會太韌, 汁都啱啱好。但有少少凍。香蔥拖羅蓉手卷。勁好食！！！誠意推介，必試。平時最怕手卷啲飯太多，呢個唔會，料多過飯，啖啖都好好味啊。安格斯牛肉烏冬。清清地，但亦唔會冇味，牛肉唔似cheap cheap 牛肉，好入味。凍凍地食，暖到入心！整體嚟講，環境服務都唔錯，同friend 黎食係一個好選擇！有機會都好想試下其他小食啊！