立体派拉麵 (棉登徑) (已結業)

其實我本人就唔係話好鍾意食拉麵，但有一次去日本旅行食到一間非常好食嘅雞白湯拉麵，令我愛上左依隻味道。今次嚟到尖沙咀覓食，知道立體派呢間拉麵專做雞白湯，就決定去一試啦！我哋兩個人就分別叫咗兩款拉麵，除咗叫招牌嘅特級白湯拉麵之外，我哋仲試咗海體醬油湯。先講講個招牌作品啦。果然冇令我失望，白湯有好濃嘅雞味，絕對食得出佢係真嘅雞煲出嚟🤣 濃郁得來又唔會好重口味，唔會有平時食豬骨湯嘅油膩，會有清新嘅感覺，呢個亦都係我鍾意食雞白湯嘅原因！而且拉麵亦都可以同店員講想要硬身定係軟身，另外拉麵配嘅糖心蛋亦都做得好好，醃得夠入味。另外醬油湯底配嘅豬腩肉都好有驚喜，表皮燒得幾香，而且非常大件！最後講吓我哋叫嘅小食，佢嘅炸雞好鬼多汁而且一定一定係即炸嘅，呢啲就一定有保證啦～ 韭菜餃都係佢哋自己手作嘅，煎得香脆之餘又唔燶。不過我就建議大家唔好叫兩樣都係肉嘅小食，因為佢拉麵已經好多肉啦。可以試吓佢嘅菠菜！飲品方面我哋就叫咗烏龍茶，係平時出面買唔到嘅日本茶，都幾特別㗎！