群記清湯腩 (已結業)

今日入左去大埔補習，難得呢個時間群記唔洗排隊，當然要入去食啦。平時星期六一定排大隊，星期日仲要唔開嘅群記，都可以算係香港數一數二嘅清湯腩專門店。九記個d就唔好提啦，能夠同群記比，應該都只有華姐清湯腩。本身諗住叫個牛爽腩米，皆因佢d爽腩肥瘦適中，油香陣陣，之前食過都好回味，可惜今日遲左去，已經沽清，唯有叫個牛面珠啦。牛面珠米講下個湯先，湯底牛味好香濃，食落有d膠質漿住個口，食得出湯底真材實料。牛面珠肉質非常嫩滑，一梳梳，食落比牛腩淋身，肥膏非常少，相對爽腩健康。唯獨牛味較重，怕騷嘅可能未必岩。總括來說，群記都算係有水準的清湯腩，值得翻食