文興記

營業中

休息中

西灣河雖然多嘢食，但冇乜邊間話好食，又感覺乾淨；不約而同聽到幾個朋友講文興記新舖好好食，喺西灣河太祥街，近太古城邊邊，新樓盤隔離；個新嚟嘅廚師做開上海菜式，所以有幾味新款上海菜；咁啱有一晚又諗唔到食乜，就去買個外賣試下喇。⭐️⭐️⭐️⭐️⭐️花雕雞髀：正到冇朋友，我最怕食雞胸，佢就啱哂我，全脾又冇骨，勁入味，睇佢細細盒，但因為全部都係肉，所以好夠食，我個人覺得係必食之選。⭐️⭐️⭐️⭐️香茅豬扒：唔講嘢食，淨係睇廚師好細心地炸嘢，再加埋佢用食物盒前，放張隔油紙先放炸物，同埋會切到一口一啖，又冇肥肉，里個對我嚟講，係絕對感動；嘢食放面， 炸到金黃適中，鬆軟味道夠，食落唔油膩，美中不足係，因為我用嚟餸飯，冇汁，就有少少乾，但本身件豬扒係唔乾嘅，用嚟餸酒或當小食或湯麵，我相信會好好多。⭐️⭐️⭐️⭐️濃湯浸津白：上湯好清甜，唔似有味精，津白係即煮，所以時間長啲，仲有好多蒜頭同冬菇片，仲超大碗，如果細碗少少，平少少，會更加好。總括：我覺得幾樣都好好味，價錢ok喇，似家常便飯，可以再去試其他。但我建議，最好打電話落order先，唔駛等咁耐。