Dozy

營業中

休息中

深水埗開咁多Cafe，身為半個深水埗人，冇理由唔拜訪一下，今日就揀咗呢間位於基隆街嘅Dozy，裝修主要用上水泥原色，充滿型格工業風。蟹籽蟹肉配檸檬刁草醬三文治配有沙律菜伴碟，淨係賣相已經攞滿分。內有厚厚嘅蟹籽同蟹肉，配合埋檸檬刁草醬，味道真係甚有驚喜。三文治上放有食用花，令擺盆好有一片風光明媚嘅感覺。另外仲揀咗慢煮香草雞扒牛油果醬意粉，慢煮嘅雞扒真係好嫩滑，基本上係唔需要用刀都可以將雞肉切開，配埋牛油果醬真係好好味。Flat White有好豐盈嘅奶泡，奶味又香又重，而且咖啡拉花都拉得好靚。Jasmine Green Tea就有一大樽，冰凍嘅茉莉茶仍然有撲鼻嘅茶香，最啱夏天飲用。最後就揀咗Tofu Cheesecake，我個人好喜歡豆腐芝士餅，因為帶有濃濃豆香嘅芝士餅，完全減卻咗傳統芝士餅嘅油膩感，絕對值得一讚。