牧羊少年咖啡館 (已結業)

今日媽咪喺荃灣大會堂睇粵劇，我收咗工過嚟接埋佢，見今日O完T飯都未食，就試下大會堂入面嘅呢一間牧羊少年咖啡館，呢間餐廳隱身喺荃灣大會堂入面，半開放式嘅設計，非常易搵，餐廳走文青路線，入面有一個大書櫃，方便各位文青漂書。煙三文魚凱撒沙律，羅馬生菜新鮮爽口，面頭有大量既芝士碎同埋麵包粒，煙三文魚鹹香有致，同沙律菜夾住一齊食，好夾。車打芝士汁鮮蝦意大利粉，車打芝士汁呈現誘人嘅金黃色，味道非常香濃，意粉口感適中，鮮蝦彈牙爽口，係我今晚最鍾意既食物。黑椒蜜糖牛柳粒，牛柳粒一客有六粒，粒粒都大大舊，分量都唔少，入口有淡淡嘅黑椒味道，然後就係蜜糖同埋牛味，令人相當滿足。Oreo牛奶沙冰，呢個牛奶沙冰果然係餐廳嘅招牌，雖然已經化成沙冰，但係朱古力味依然咁強勁，面頭嗰pat cream更加係重點所在，香滑軟熟，連埋塊Oreo脆餅一齊食就very good 喇。焦糖朱古力芝士餅，終於嚟到我最期待嘅甜品環節，焦糖均勻地散落於芝士餅既面頭，形成一幅精彩嘅大理石圖案，入口先係濃濃嘅芝士味，跟住係焦糖味，最後散發嘅係淡淡嘅朱古力味，係一件味道幾豐富嘅芝士餅。