天天海南雞飯 (Fashion Walk)

營業中

休息中

今日約咗個舊同事見面，同佢喺附近行下街；之後就搵嘢食揀咗呢間天天海南雞因為知道佢鍾意食海鮮。呢度除咗出名食海南雞，亦都出面食蟹。點咗個新加坡黑胡椒蟹肉粉絲煲；砂鍋新加坡麥皮羅氏蝦同埋黃金八爪魚呢度裝修（店鋪名個牌匾）都好有新加坡feel，嘆住茶等食物到。好快黃金八爪魚就煮好，香味十足，外皮被鹹蛋黃流沙包住，食落去非常惹味，炸漿夠曬薄脆，熱辣辣炸起。裏面嘅八爪魚非常大又彈牙，食起嚟煙煙韌韌又唔會難咬。邪惡好味道！轉頭麥皮蝦都整好喇，用上好多麥皮同埋洋蔥烹煮，砂鍋煮法令到佢哋更加香。蝦肉同樣彈牙而且啖啖肉，夠晒新鮮。我同朋友都係第一次食麥皮做法，又唔會好似清蒸白烚咁淡但係又畀起其他濃郁嘅醬汁更加食到蝦嘅鮮味，好特別。至於黑胡椒蟹同粉絲煲熱辣辣滾住，底下嘅粉絲吸曬精華，非常惹味開胃；蟹肉份量都好多，拆咗肉亦都方便易食，新鮮好食，太正！凍凍地嘅天氣，食物熱住嚟食，邊傾邊食，特別滋味。今餐海鮮餐真係高質素，舊同事係海鮮控都非常滿意。