阿詩瑪壹菌 (已結業)

今日同朋友行經太古城，最煩就係諗食野，水牌上求其揀左阿詩瑪壹菌。一到門口即被富有中式裝潢吸引左，好濃厚民族氣息，感覺好浪漫。第一次食雲南野，只知道小數民族菌類最出名，亳無頭緒點餸，於是叫左個二人餐。首先有拍黃瓜同硽蘿蔔，黃瓜唔太入味，反而蘿蘿爽脆可口，加埋二人餐既香醬涼茄子以及山木耳，即時食慾大增。前菜之後，一人一小碗山珍氣鍋雞，一開蓋，係菌類配合下香味撲鼻，雞湯鮮甜，雞肉嫰滑，估計因為個壼係密封，所以將肉汁以及香味鎖住，二人極速飲完個湯，有衝動encore。話明菌類最出名，點少得來碟火爆牛肝菌。牛肝菌喺青紅黃椒以及蒜片陪襯下，完全帶出香味，食落好爽，以及微微地辣，聽講全部雲南新鮮運送過來，其他餐廳未必試到。糖醋里脊，外脆內軟，一啲都冇誇大，肉塊并非全瘦，帶小小肥，但感覺唔肥膩，可見師傳功力深厚，吾同於一般餐廳，呢度選用蜜桃做配菜，效果更突出，唔會因菠蘿既酸甜程度影響左里脊味道，送飯一流。濃湯浸田園時蔬，不過不失，外形似油麥菜，不過更爽更脆。甜品為呢餐添上美好句號，玫瑰冰粉，冰粉似啫喱，又似寒天愛玉，但口感更加彈同Q，配上玫瑰花瓣，養顏滋潤一流，充公埋老公個杯。