愛家國際餐飲 (已結業)

星期日得我同媽咪兩個人食lunch, 唔想飲中茶食點心，亦唔想食茶記咁肥膩，一於去食素。橫掂我同媽咪都鍾意食素。本來想去近排人氣嘅素食主義，不過北角有d遠，唸起灣仔愛家素食，即刻起行。愛家由軒尼斯道搬左去灣仔道，仲上埋樓，真係生意難做。上到去差唔多2點半，竟然有下午茶優惠（8折）。我地點左愛家漫波排飯餐加素蛋，同埋冬陰公海鮮湯跟餐（包紅麴米飯同是日餐湯）。愛家係自助快餐式，自助到收銀處點餐，佢會叫號碼取餐，水同餐具都係自助，逢星期六日都有人註場彈結他唱歌，幾homely.愛家漫波排飯其實係日式素鰻魚飯，跟紅麴米飯，湯，炒菜，同沙律。是日餐湯係西洋菜羅漢果湯，好清甜滋潤，沙律內含青瓜絲同千島汁，炒菜冇蒜，清新可口，至於素鰻魚，味道口感直情可以假亂真，外皮脆兼有照燒汁味，內裡軟糯，非常好食，素蛋外形似煎荷包蛋，實質係腐皮扮蛋白，薯仔茸扮蛋黃，味道唔錯，雖然冇任何蛋味。冬陰公海鮮湯都幾大窩，不過太咸，好彩裡面嘅素海鮮冇吸晒d咸味，如果唔係真係要送幾碗飯，湯內有豆腐，腐皮等等，味道一般。本來想試埋甜品，見佢有忌廉蛋糕，冇蛋嘅雪糕，南瓜布甸等等，不過太飽，唯有等下次再試。