東園酒家宴會廳 (已結業)

大食妹又係時候為大家搵好野食，今次就一於到灣仔一間酒樓試下佢地既炒小菜。鮮竹銀杏浸時蔬（$78）：聽講依道的鮮竹係自己製造，師父每日都係用豆漿自己整鮮竹用黎，所以依個鮮竹係俾出面特別好食，唔會有油味，加上菜又新鮮，唔會黃，所以時蔬浸落鮮竹入面，吸收鮮竹的味道後更加係絕配。士多啤梨骨（$78）：生炒骨平時就食得多，今次用士多啤梨漿整都係第一次食，用上新鮮士多啤梨打爛成醬汁，再用上新鮮排骨炸成，食落酸酸甜甜，真係好似食士多啤梨一樣，好食過平時就咁用菠蘿整既生炒骨，加上師父炸得金香，令到排骨唔會太多粉同硬，所以食多幾舊都唔會有太油的口感。菜甫肉鬆煎蛋角（$88）：依家係街要食到出色的煎蛋角真係好難，係依到終於再次食到出色的蛋角，師父煎得好有技巧，蛋角金香得來，唔會太濃亦都唔會食到滿口油，加上肉鬆入味，令到蛋角都吸晒肉鬆的味道，真係要食既小菜。今次，大食妹俾4.5個大食指數，因為依道的菜式特別，而且師父手功了得，真係小菜之選。