Cine Times小食部(時代廣場) (已結業)

宜家兩個人睇場戲買埋小食要三百幾蚊，除咗戲飛經常因為各種原因上調票價外，戲院小食部食物價錢亦唔平。要吸引到觀眾幫襯戲院小食部而唔係偷運私伙零食入場，就要動腦筋添加汽水爆谷熱狗以外嘅選擇，但係又要顧及食物種類必須方便喺戲院黑暗環境内進食，真係唔易。 最近去Cine Times 見到兩樣幾特別嘅嘢。長洲大彈魚蛋，係咪真係長洲出品就唔知，但確實比一般魚蛋大同彈牙，仲隱隱食到鮮魚味，正！落少少豉油辣油調味已足，毋須用咖喱汁掩蓋味道！但三十蚊四粒真係貴咗啲，而且話咁快食完，似乎唔多啱做戲院小食一路睇戲一路慢慢食… 另一樣粒粒雪糕，初初見到好興奮，以為童年回憶返嚟喇！點知食落似粒粒冰多啲，一啲都唔滑，又冇香味，果汁味又假！以前嗰隻粒粒雪糕係咪揾唔番？ 要突破汽水爆谷熱狗，真係唔易呀…