魔膳廚房 (已結業)

上晝到觀塘辦D事，咁就順便喺度食埋個 lunch，好在而家工業大廈嗰邊開咗好多唔同類型嘅食肆，選擇多咗好多。今日揀咗呢間坐座落業發工業大廈第一期嘅魔膳廚房，雖然要行一層樓梯上去，但樓梯兩旁都掛滿藝術作品，佈置得幾得意幾有特色，希望花同樣心思喺D嘢食度喇。餐廳入面都佈置得好有心思打開餐牌一睇，呢度 Lunch set選擇都算多，加$10有餐湯餐包，再加多$20就有埋任食嘅自助沙律吧㖭。餐湯餐包先上，南瓜忌廉湯賣相同味道都唔錯，餐包亦唔係一般貨色。主菜未嚟，整碟沙律醒醒胃。我今日揀咗越式椰青咖哩鷄配意粉($58)，咖喱甜中帶微辣，唔同平時食開又濃又辣嗰啲味道同口感，幾清新。同行友人點咗蒜香欖油巴馬火腿蝦球意粉($65)，佢話D蝦食落夠爽，而意粉喺淡淡蒜香中帶點微辣，味道同口感都恰到好處。最後歎番杯香濃咖啡，可算喺為呢餐畫上圓滿嘅句號。