囍 (已結業)

年初一二三除咗大集團多數都要加一外另加其他小費，見到囍晚市打邊爐限時90分鐘，新春收費每人168，平平地同朋友共聚都唔錯。囍位於宏利金融中心，近觀塘碼頭，位置比較偏遠。朋友話佢見平日返工中午多數做寫字樓客日式午餐，最近先見有晚市邊爐。新春套餐168包無限添加海鮮拼盤、黃金雞、特選牛肉、黑豚肉同牛脷。揀選咗黃金雞木瓜湯底，餐牌介紹用印尼椰子水，自家農場雞同有機木瓜同滾，湯底特別又清甜，感覺上打邊爐都冇咁熱氣。等湯底加入黃金雞滾起時先出去攞前菜食著先。前菜有芝麻醬番茄、蟹柳火腿沙律同枝豆。切片番茄加上芝麻醬幾惹味。蟹柳火腿沙律有少少肉味釣味好容易越食越多，要留肚食邊爐。雞肉剛滾起時食嫩滑又有雞味。海鮮拼盤一人一碟，有原隻魷魚連魷魚骨，好新鮮彈牙。生蠔滾熟都唔太縮水。本地青口同中蝦味道鮮甜。黑豚肉同牛肉油花分佈平均，可以任食真係幾抵，不過其實每人一碟都夠。牛脷薄切滾兩滾就食得，爽口薄脆，同炆嘅食法又唔同。蔬菜種類有廿幾款都幾多，味道鮮甜，自己鐘意食乜夾食，肉丸雖然係來貨但都有肉味又彈牙。飲品乳酪雪糕自助，連加一每人唔使二百，雖然限時九十分鐘不過真係算平。