玉桃軒酒家 (康怡廣場) (已結業)

自從太古美心執咗，就移茶地去玉桃軒。新派裝修地方較大，台與台之問距離大，兩點後開始有下午茶七五折，可以先拎飛，我見有人點半開始排隊，準時兩點入座。點心種類超多，新款春風得意腸到懷舊芝麻卷千層糕都有。炒粉麵飯燒味一樣好多選擇，我當然主攻點心。兩個人先叫一round 慢慢嘆魚肉青椒，留意返係青唔係尖，啱曬唔食得辣的朋友。魚肉份量厚過青椒，所以有咬口。春風得意腸，好多時做法都唔一樣，呢間包嘅係原條炸春卷，無兩條扮三條擺法，大方三大卷！！！春卷皮炸得好脆，包冬菇荀絲另加爽身口感解油膩，提提大家叫姐姐分開豉油上，唔係就好似我們咁整起等啲豉油唔會浸淋曬啲春卷皮。沙嗲魷魚，朋友問我食唔食其實想答唔好，因為好多時喺其他茶樓食親個汁都傑到有粒粒令魷魚好溜，不過我收口照叫，點知正喎，魷魚要彈牙唔難，佢個汁稀身得黎足沙嗲味，成為今日第一位！蝦餃，皮薄蝦彈無乜荀絲，可以solo 一籠！傳統千層糕，已經比較少見嘅一款懷舊點心，簡單講即係蛋黃包，仲有蛋黃粒，我建議最後先食同叫呢個就唔好叫其他包點，超飽肚！原本諗住round 2 再加甜品都食唔到了，但亦因為咁呢餐茶飲得超平！