SAYAM Thai/Bar (已結業)

自從恢復晚市堂食後，朋友們都紛紛相約晚飯一聚。今晚就有個好姊妹約左我嚟銅鑼灣呢間由泰國廚師班底主理嘅「SAYAM Thai/Bar」吃新派地道泰菜。餐廳佔地全層，地方頗大，環境寬敞闊落，空間充裕。裝潢以木系檯櫈為主調，配以窗邊嘅花束和牆身上嘅植物壁畫，風格清新，令人感覺舒適愜意。餐牌分食品和飲品兩份，食品有湯、沙律、小食、串燒、拼盤、咖喱、海鮮/肉類、蔬菜同飯麵；而飲品就有 cocktail、mocktail、泰式特飲、啤酒、汽水、果汁及咖啡等。 點左椰汁雞湯 ($84)、燒海鱸魚 ($274)、香葉肉碎飯配太陽蛋 ($98) 同 一碟馬拉盞炒西蘭花&椰菜花 ($88)。碗椰汁雞湯標明係一人份量，但係估唔到原來都咁大碗，內有不少蘑菇、蕃茄、肉碎和洋蔥，絕對足夠兩個人分享。湯底用上新鮮嘅椰青水，再加雞湯熬製，湯身好柔滑，入口非常香濃，而且飲落仲帶微微酸辣，夠晒惹味。平時食泰菜，多數會揀明爐烤魚，今次就一於搞搞新意思，試下呢度嘅鹽燒海鱸魚。鱸魚以木托盤原條奉上，揭起外皮再撥開魚身上嘅香料，雪白嘅魚肉即時活現眼前。魚肉非常嫩滑，味道鮮甜，鹹鮮中更滲出淡淡香料嘅清香，連醬汁也不用蘸已經很美味。