麵檔 (已結業)

遲收工趕返屋企，在最近小巴站新開了呢間地牢麵檔，門面光猛，落地牢條樓梯裝修有特色，好似將啲調味招紙做裝飾！入去只有一枱客，地方裝修新潮，乾淨企理，個男店員好有禮貌，知我外賣叫我坐低慢慢睇餐牌，講真食物唔便宜，揀咗一個A餐加油菜，外賣要收多$2外賣盒錢！收銀阿姨好明顯唔熟手，要男店員慢慢教㩒機，只可以比現金唔方便，之後又叫我坐低等5分鐘！睇住半開放式廚房煮食物，男店員仲好有禮問我要不要醋同辣椒油！包好交比我，仲幫我推埋門！服務真係唔話得！細蓉餐（$58）雲吞四粒，估唔到浸湯半小時仲保持爽口，皮都無爛，勁！（本來已經有食爛雲吞嘅準備）麵難免發大了，幸好仲少許彈牙，落紅醋，唔太酸，唔會嗆喉，辣椒油好香，唔會辣到嗆喉！湯底清澈味濃，食晒！油菜菜心：估唔到咁多，可惜焗過半小時淋咗，梗都仲好，菜葉淋晒，不過呢個唔關餐廳事！外賣問題！蠔油另外上幾好，份量可以自己決定！又唔會令到油菜水汪汪！辣椒油：好香唔辣唔嗆喉！包裝企理，用晒靚膠盒，連調味料都分開裝！唔會撈定落食物度！可惜自己外賣，菜焗淋了，麵發大了！不過味道仲幾好！堂食應該會好好味！雖然價錢唔算便宜，服務環境搭夠，好過食完要谷氣嘅！