新蒸武門 (已結業)

今日同朋友喺觀塘工廠區附近搵嘢食，喺駱駝漆附近搵到一間sell健康嘅中式菜館。 入到去每張枱都放咗個好有特色嘅茶杯，入邊已經有八寶茶嘅材料，杯八寶茶好香，味道好複雜，但加咗好多次水，味道依然好濃，好飲之選。 我哋叫咗個二人餐，我哋將兩個頭盤改咗做一個三色拼盤，另外我哋有兩個是日燉湯，豉油皇蝦，荷葉香菇蒸雞，籠仔班頭腩，濃湯杞子浸菜同蝦仁鮑絲炒飯。 三色拼盤首先送上，入面有五香牛展，佛山薰蹄同花雕鴨舌。牛展好香，鴨舌有啲酒味，而佛山薰蹄亦都好爽脆。 之後是日餐湯都送上，今日餐湯係姬松茸節瓜螺片燉豬展湯，碗湯入面啲料好足，有瓜有螺片，而且一啲都冇味精。 仲有兩隻豉油蝦，蝦肉好新鮮彈牙，而且豉油都好入味。 之後係籠仔班頭腩同荷葉香菇蒸雞，籠仔班頭腩啲肉好新鮮，同埋有啲蒜蓉香。之後係荷葉香菇蒸雞，雞肉好滑好彈牙。 仲有濃湯杞子浸菜，啲菜係娃娃菜，啲濃湯同杞子味入咗喺啲菜度，而且啲菜唔會太淋。 最後係蝦仁鮑絲炒飯，啲蝦好大隻，同鮑絲都唔少，味道不錯。