陳根記

營業中

休息中

以前禾輋舊舖由中學食到出黎工作，最鍾意佢選擇多，夠鑊氣，開得夜，如今搬左黎石門，一於約班兄弟會一會佢先！平日一至四夜晚10點後係宵夜時段，多款小菜特價，叫多幾款食盡佢！次次黎都會叫蠔餅，蠔仔份量合理，炸得鬆脆，唔會成口油。平時茶記碟頭飯d茄子好易中伏，有d無拉過油都夠膽死放上檯，而茄子鵝腸煲就夠晒熱辣辣，茄子拉過油先出到咁靚ge紫色，鵝腸都唔少，個汁就似無落鹹魚ge魚香茄子汁（正宗魚香茄子真係無鹹魚），送飯一流。馬拉盞炒通菜夠鹹香，無渣，爽口。蒸蛋好滑好香，似係加左雞湯。十三味豬雜煲望落好似水煮菜式，食落只係少少辣少少鹹，都幾油，成煲野有大量芽菜金菇，豬雜就只有幾塊豬肉、豬潤、豬粉腸同豬肚……索價$85，好失望。好彩壓軸出場ge揚州炒飯同乾炒牛河絕不欺場，炒飯夠乾身，粒粒分明，炒河比一般香甜，可能老抽落得較多，但無損風味，河粉無痴埋一團，牛肉唔韌，無用梳打粉醃過龍，兩碟都鑊氣十足，大大碟，食完隻碟唔會油。