好運泰國美食

營業中

休息中

前排去開喺新蒲崗圖書館，試咗樓下間泰國菜，又整體感覺真係唔錯，消暑又抵食，食到飽飽都只係200蚊左右。安格斯牛沙律，味道酸酸辣辣，牛肉好嫩口，加埋乾蒜、煮到甜曬嘅洋蔥、車厘茄同粟米，消暑又開胃。朋友想食熱食但又覺得天氣好熱，所以揀咗芒果海鮮炒飯，餐廳非常闊綽，落咗唔少鮮蝦，配埋青瓜同大大粒嘅芒果，成個炒飯甜甜地，食落夠清新，降溫效果一流。泰國菜必食嘅甜品芒果糯米飯，賣相好精緻，有兩排紫色同白色糯米飯團，並可按喜好加椰汁，有清甜嘅芒果中和味覺，甜而不膩，真係好滿足。朋友叫咗泰國黑咖啡，味道偏甜，啱晒甜品控。我就揀咗泰國奶茶，個人覺得泰式奶茶比港式好飲，甜甜地又唔會太苦澀，成個感覺更加順滑。