新蒸武門 (已結業)

收咗工同屋企人去食飯，揀咗喺駱駝漆大廈嘅新蒸武門，睇個名以為係蒸爐式嘅打邊爐，但原來佢出名嘅係蒸籠飯。一坐低就梗係要嘆下餐廳出名嘅八寶茶， 每一杯茶裏面都配有菊花紅棗等配料，唔係話一大壺水開到好稀嘅茶， 甘甜可口 ，$10茶芥可謂物超所值。是日燉湯係菜膽花膠燉雞，每碗都非常足料，鮮甜味美，飲完唔覺得口乾，應該冇乜點加味精。時菜炒鮮斑球嘅班塊好腍好滑，西蘭花球砌出嚟嘅大細非常之適合一口一件， 好快就清咗呢啲美食啦！蜜椒炒牛柳嘅牛柳新鮮滑溜，唔係話加咗鬆肉粉嗰啲味道質感，炒埋三色椒配搭更加健康。芝士蝦球伊麵嘅芝士味比較清淡， 即使唔係好喜歡芝士味道嘅屋企人，亦都食到舐舐脷。 本身佢冇跟青菜或者蔥亦都好遷就到揀飲擇食嘅屋企人😅 蝦球比較細，如果可以揀返大蝦，效果加倍理想。濃湯雜菌浸魚滑，雜菌同魚滑嘅比例好平衡，唔係話少少魚滑多多雜菌嗰種偷工減料嘅感覺。加咗黑木耳，清淡中更為健康 健康。土魷蒸肉餅魷魚鮮香同埋肉味都好突出 ，食入口嘅口感好細嫩，配飯食係一流嘅配搭，更加有家嘅感覺。當晚每人揀一道菜，揀揀吓竟然冇人嗌招牌菜，唯有下次再食啦。