Asian Lab

營業中

休息中

黃埔有間新餐廳，主打正宗越南同馬來西亞菜式，沙律、湯、小食、湯粉麵飯、三文治、主菜、蔬菜、甜品、飲料，樣樣有齊，價錢親民化，地點方便，街坊朋友仔可以去試一試～ 前菜要咗Shredded Chicken Salad，以雞肉、雜菜、青瓜、花生等混合而成，口感豐富，配上越式酸汁，令到整體味道更加開胃。Appetiser Platter包含蔗蝦、春卷、雞翼同大蝦米紙卷，性價比高適合多人分享。個人最喜歡蔗蝦，大大條，咬落彈牙，記得要咬埋個蔗！另外加配Vietnamese BBQ Pork Skewer，私心推介呢款，豬肉味突出，越食越上癮～ 想食得健康啲嘅可以要蔬菜，烹調方法可選擇馬拉盞炒、蒜茸炒或順化辣醬炒，怡保芽菜新鮮又爽口。主食要咗Nasi Lemak，椰漿飯有驚喜，粒粒分明但咬落軟糯，帶著淡淡椰香氣，撈埋旁邊嘅花生，乾魚仔等可增添口感。Rendang Beef就正常發揮，根位比較多，下次會想試炸雞髀。Bak Kut Teh有一人或二人份量，可以揀要一字骨、三層肉、豬軟骨或大雜錦。肉骨茶唔苦，小朋友都應該接受到，一字骨份量比想像中多，唔算好滑但煮食湯嘅算係咁。