甜悅

營業中

休息中

旺角最近有間新開嘅甜品店，除咗有多款中式糖水之外，亦有台式、西式等甜點供應，可堂食亦有外賣選擇，最緊要價格親民，地點方便。店內環境唔大，簡約裝潢，近排天氣寒冷，過嚟食返碗糖水暖吓身就啱晒啦🫣養生之選有燉雪梨海底椰雪耳同燉紅棗蘋果桃膠，可以揀要熱或者凍，前者潤肺止咳，後者補血益氣，雪梨同蘋果都係半份上，清甜可口，糖水濃稠度適中，餡料豐富，而且冇額外落糖，所以主要甜度來自本身嘅食材，感覺好健康。私心推介椰皇燉蛋白，原個上，賣相吸睛，打卡able又好味。口感嫩滑，椰皇清香帶甜，同蛋白香氣兼備，食完仲可以挖埋椰青肉食，醬汁可自行選擇，芝麻糊味出，但個人更喜歡分開食。小食方面有桂花薑湯小丸子，湯底夠薑辣，丸子Q彈帶咬口，食完都幾飽肚。