金記冰室 (新港城中心4期) (已結業)

成日都話沒冰室/茶記的服務態度唔好，今次真係有唔同既新感受。朋友因為四點先放工，所以約佢一齊去食下午茶，又未去過金記，所以就提議去試O下。入到去，"歡迎光臨"就緊係唔少得，仲有好幾位後生仔係舖頭做，成間舖頭都充滿活力，仲主動俾兩杯水俾我哋，又問我哋用個apps 有無問題，好體貼!下午茶好多選擇，見到身旁既食客都係叫炒少麵，但係我哋又覺得太heavy，睇咗幾次個餐牌，都係俾餐肉蛋即食麵既圖吸引，忍唔住都一齊叫同一款。自己用手機落單都唔係新鮮事，仲可以選擇麵底爽O的定淋O的，蛋又可以選太陽蛋、熟蛋、炒蛋，完全俾食客自己選擇，又唔會落錯，又可以有話事權，食得開心又滿足朋友仔話係出前一丁既麵底，可惜無俾包麻油，就少咗最重要既精粹。但係好欣賞佢既餐肉，有煎過但係唔係好肥既餐肉，有質素既餐肉，成個餐包埋野飲都係$31 (配熱飲)，真係好飽!