新東記火鍋店 (已搬遷) 新店位置

去到尖沙咀，四個人諗緊去邊度打邊爐，就上到去一間一出門口就係紅酒櫃，叫做《新東記》火鍋餐廳打邊爐。我哋被安排坐戶外嘅位置，好彩咁凍嘅天氣之下，隔離有一個好高嘅火爐取暖。餐牌上都有好多火鍋配料同埋小食選擇，隨即揀咗個滋補烏雞鍋。湯底有椰子絲同埋一大隻黑色烏雞，飲一啖湯底非常鮮甜，而且非常足料。飲品方面，朋友們叫咗幾支啤酒，我就揀選左一榨自家製竹蔗茅根水，仲有熱飲添，可以清下熱氣暖暖胃。火鍋配料方面，牛魔王的我們揀選左鮮嫩肥牛肉中嘅牛頸脊，食落去質感好林，牛頸脊肉嘅條紋好平均。有一位唔食牛嘅朋友就叫咗日本黑豚肉。除此之外，火腿、午餐肉、順德魚腐、粟米、枝竹上等素、山根、油麥菜、冬瓜片、山水滑豆腐、黑牛柏葉同埋日本蟹柳等等都非常新鮮。當中嘅鮮肉韭菜餃好大隻，皮薄喊靚，食落去好多豬肉碎同埋韭菜，新鮮即做。鬆化響鈴卷即叫即炸，食落去香脆可口，只需要放入火鍋灼三秒就食得。食咗咁多野埋單都只係＄2000有找，每人平均消費＄500，價錢合理，而且火鍋配料非常新鮮，咁嘅價錢非常抵食。