九重鮮 (已結業)

朋友請食飯，特意介紹一間蒸海鮮的餐廳，嚟到門口先知道原來係近似放題任點的蒸海鮮同串燒。門口整得好有韓國特色，天花上七彩的波波燈裝飾，幾啱打卡一行五人叫咗五個中價位餐，如果叫最高價位的餐會包醬油蟹，其餘好似同中價位嘅差唔多。飲品自己出去拎，頭一round有蒸扇貝蒸龍蝦蒸鮑魚，一嚟到待應會同你講大概蒸幾多分鐘比較合適，粉絲蒸扇貝入味，龍蝦鮑魚新鮮彈牙。其他嘅海鮮同埋串燒就可以經app任叫，上菜速度好快，海鮮有蠔蜆蝦，基本上全部都好新鮮，不過有啲蠔就會比較細隻，建議可以叫多幾隻一次過蒸。串燒種類繁多（連叉燒都有😲），最推介燒蝦同燒冬菇。另外仲有小食一口牛、吉列紫薯餅，選擇都好多。小食當中最有驚喜係麻辣蜆銀子燒，其實如果淨係見到個名我都未必嗌，但友人極力推薦，叫咗一客，一嚟嘅時候，一個瓦兜中有錫紙包住蝦蜆粉絲連湯汁，侍應會即場點火燒一燒，一食好鮮味，有驚喜，而且同個麻辣好夾，忍唔住即刻叫多咗客。最後每人有一客甜品，有少少似泰式椰汁糕 一層類似椰漿在面，底下是清甜椰青水味大菜糕，為富嘅一餐作結。