夢の丼 (已結業)

好鍾意去香港大學站嘅西環碼頭睇日落，晚飯嘅時間經過夢の丼，見到裝橫好日式，價錢又唔錯，於是就決定試吓啦。一入到去店員都好熱情咁樣招呼我哋，為我地遞上熱茶，我哋叫咗一條燒鰻魚，同埋兩個丼飯。轉眼間已經有麵豉湯同埋沙律食。麵豉湯嘅質素都唔錯，入邊嘅材料都幾多，除咗海帶仲有海鮮。我哋叫咗招牌 夢の丼同埋一番拖羅丼。夢の丼 海鮮好豐富。我先用佢哋特製嘅開胃汁（橙加上秘製汁）配上超大嘅帆立貝，酸酸地，配埋新鮮又彈牙帶子，有種講唔出嘅滿足感。佢哋嘅三文魚蓉好特別，好少地方會將三文魚以魚碎嘅方式呈現，上面再用火槍燒香，魚脂味香濃。最特別嘅地方係佢哋嘅飯早已經有師傅用豉油調味，唔需要額外自己調味，比自己調味更加好食。一番拖羅丼，鍾意食拖羅既人絕不可錯過。佢哋用唔同嘅方式烹調，唔同嘅整法都可以得出佢嘅鮮味。我自己最鍾意係火炙，入口即溶嘅感覺👍🏽最後一定要推介燒鰻魚，原條鰻魚，肉質好彈牙，而且個底煎得好香脆，加上秘製醬汁，每一啖都係滋味。