雞煲皇

營業中

休息中

一踏入冬天就想食雞煲，之前一直幫襯開一品雞煲，上網見到雞煲皇都好出名，於是就約埋朋友一齊嚟食。我哋幫襯嗰日咁啱天氣轉凍，正正係食雞煲嘅好時機。我哋大約7點左右到餐廳，一到場就即刻叫咗雞煲，豉油皇鮮魷麵，本地手切肥牛，萵筍，油條，牛柏葉等等配料。鮮魷麵好快就上，味道正常，反而雞煲我哋等咗接近半個鐘，可能同當日有好多客人有關。雖然等得有啲耐，但雞煲味道真係唔差，入邊嘅雞塊切得好大塊，同埋好嫩滑。我哋雞煲叫咗小辣，但都唔係話特別辣，容易入口，適合一啲唔食得辣嘅朋友。另外值得推薦嘅係本地手切肥牛，真係好新鮮，牛肉好滑，入口即溶。