泰聚 (已結業)

炸蝦餅勁正！份量好夠，即叫即炸，所以食落口好熱好脆，啲醬都好似係精心調製嘅咁，唔似平時啲泰國店用啲甜辣醬嚟點，啲醬好似係甜柚子醬，蝦餅點左嚟食會減少好多油膩感。串燒拼盤配上個醬嚟點。一甜一酸，幾特別，賣相都幾靚。串燒可以自己揀配搭，豬牛雞，口感不錯。柚子蝦沙律值得推介！大份足料！啲蝦又好新鮮，啖啖都有柚子肉，配埋啲柚子醬汁，超正！大大碟夠四人分。鹽燒鱸魚又係不能錯過嘅一道佳餚，因為即叫即整，等嘅時間會耐啲，條魚比一般出面嘅店都為大，塊皮係一揭就同肉分離開，容易取肉嚟食。配搭嘅醬雖然都好夾，但就辣咗啲，即使無點醬，條魚都已經好香好有鮮味。