蒙麵

營業中

休息中

蒙麵係紅磡一間非常出名嘅車仔麵小店，長期大排長龍，可見佢喺區內嘅人氣有幾高！同一般車仔麵店唔同，蒙麵提供咗好多其他車仔麵店少見甚至冇嘅餸菜，餐牌選擇多到令人驚喜。單睇舖頭門面，已經感受到老闆係一個極具性格嘅人，充滿特色。今次我決定試吓幾款特別嘅餸菜!招牌蜜汁叉燒串蜜汁叉燒串係即叫即燒，熱辣辣送上枱，外層微微焦香，散發陣陣蜜汁香味。叉燒肉質嫩滑，帶少少焦糖味，鹹甜適中，真係一試難忘，一大串咬住食特別過癮！新鮮花甲呢度嘅花甲絕對係新鮮到冇得頂！我排隊時仲見到一車車新鮮花甲送入舖頭，啲花甲肉鮮甜細膩，最重要係完全冇沙，呢個餸絕對係加分之選。新鮮蝴蝶腩蝴蝶腩食落去肉質嫩滑，但調味偏淡，建議配埋佢嘅指天椒豉油一齊食，味道即刻提升，辣味同鹹香融合得啱啱好。蠔仔煎蛋車仔麵仲有蠔仔煎蛋做餸，呢樣喺其他車仔麵店真係少見！送上嚟時蠔仔煎蛋係直接放喺碗麵入面，蛋味香濃，煎得剛剛好，蠔仔鮮美又唔會腥，成個搭配非常特別，絕對值得一試。西洋菜餃西洋菜餃唔係成日有，所以餐牌上冇列出，要自己寫落單。如果見到有呢款餸，記得唔好錯過！餃子相當大粒，薄薄嘅外皮包住滿滿嘅內餡，西洋菜嘅清香同肉餡完美結合，口感豐富，非常飽滿。