星巴克咖啡

營業中

休息中

D人好鍾意去D有海景嘅餐廳食飯，價錢都一定好貴吓，好多時貴就貴在個靚景！趁星期六天氣剛轉熱，但都仲係廿幾度，有D陽光，有D海風，仲有海景，好hea咁同太太晌中環天星間Starbucks，買咗個蒜香雞肉意大利軟包加熱朱古力俾佢，我就要瑞士芝士火腿意大利烘包加焦糖咖啡，再上一層開揚D嘅海景位，嘆一嘆！間Starbucks門口都有枱有凳，但上一層有個平台位仲好D，對住維港，睇住一架又一架天星埋岸離岸，又望吓上船落船來來往往匆匆忙忙嘅人，心情好似去咗旅行咁，輕鬆閒逸，係度食嘢真係幾爽！兩個包叫侍應烘番熱，D芝士半溶咁好正，蒜香雞肉意大利軟包個包好香蒜蓉味，雞肉就一般啦；而個瑞士芝士火腿意大利烘包，薄蔣嘅巴馬火腿鹹鹹香香，亦唔錯！加上我杯焦糖咖啡，再落少少玉桂粉，味道幾多樣化！唯一最唔好係有D無幫襯嘅人霸住咗D枱凳，仲要坐一張凳，擺嘢又放落另一張凳，兩個人已霸晒成張枱，見住其他拎食物嘅人都唔諗住讓一讓，無品！