軽食堂

營業中

休息中

香港嘅疫情最近呢一兩個月變得嚴重，連帶住買好多餐廳同埋零售業都開始有倒閉潮，連我公司附近長期會開嘅餐廳都得返一間麥當勞，今次真係搵食艱難！雖然係咁，但係最近返工嘅途中都見到有啲新餐廳逆市求生，今次呢間餐廳位於香港站，主打做外賣嘅生意，好適合大家可以買返去公司慢慢食唔需要喺街邊逗留太耐，今次我一於為大家試吓佢有乜嘢食啦。呢間餐廳主打係日式便當，我自己今次就叫咗日本豚肉咖喱同埋雞扒咖喱試吓！呢間餐廳嘅白米使用珍珠米，就算我買咗之後隔咗幾個鐘先叮嚟食，佢都依然保持住粒粒分明。日式咖喱汁入邊有蘿蔔，薯仔同埋洋蔥，令到大家就算買外賣都可以保持到營養均衡，增強抵抗力。店舖將豚肉製成漢堡扒，令到成個飯變成日式家庭風味，肉嘅味道好香濃，仲食到有洋蔥可以減卻肉類嘅騷味，我個人都幾推薦！佢嘅雞扒都唔錯，雞扒預先用照燒汁烹調，為咖喱嘅味道提供兩種層次，我自己極度推介記得要加錢買埋佢哋嘅溫泉蛋，佢哋嘅溫泉蛋超級滑溜之餘仲有蛋香，軟滑嘅口感絕對為咖喱有畫龍點睛嘅效果，大家如果有興趣記得去試吓啦 ！