淼屋 (已結業)

友人最近榮升老闆，決定食番餐好慶祝下。上網 Search 到呢間「淼屋」，餐廳位於蘇杭街 Akvo 酒店 1 樓，店內裝潢簡約，傳統和風擺設，配以一室梳化座椅，格局別緻。另外餐廳亦設有小露台及 VIP 房，並提供包場服務。先點罐 Premium Malt's Beer 賀一賀佢，如果係 Happy Hour 到訪，更會有買一送一優惠，超抵飲。另外餐廳亦有唔少手工啤供應，用料大膽且款式夠多，捧住啤酒，Chill 住談心，一樂也！餐廳走日式居酒屋路線，午市以供應套餐為主，包沙律、前菜、吸物及白飯，分量十足。我哋每人點咗個 Lunch Set。鱈場蟹肉湯烏冬 ($198)第一眼真係有「嘩」一聲嘅感覺，食材好豐富，烏冬面頭鋪滿了蟹肉、油揚、蒲鉾、鮮菇和昆布，勁足料。蟹肉彈牙又多汁，富清香蟹味。烏冬滑嘟嘟，帶淡淡小麥香，配埋鮮甜嘅蟹肉一齊食，令味蕾為之一振。一口和牛粒定食 ($228)和牛燒得啱啱好，肉質微脆，入口鮮香豐腴，美味入魂。夾喺中間嘅蒜片，味道亦非常討好，炸至金黃色，鬆脆又乾身，食落亦唔會過焦或過苦，配埋和牛粒同珍珠米飯吃，甘香又飽肚，好滿足。